ഓസോൺ പാളിയില്ലാത്ത കാലത്ത്

പൂക്കൾ വിരിയുന്നിടത്ത് വസന്തം വരും
ആസ്പത്രി വരാന്തയിലെന്ന പോലെ
മരുന്നു മണത്തിൽ മുങ്ങി
വസന്തമാ മുറിക്കുള്ളിൽ
കൂനിക്കൂടിയിരിക്കും ..

മാനം മുട്ടിയ വന്മരങ്ങളുടെ
വന്യ സൌന്ദര്യം ചരിത്രത്തിന്റെ
സ്ക്രീനിൽ തെളിയുമ്പോൾ-
ആകാശം കാണാത്ത ബോൺസായികൾ ക്ലാസ് മുറികളിൽ ബോധം കെട്ടു വീഴും..

കാടും പുഴയും പാടവും,
പതിഞ്ഞ പടങ്ങളെ നൂറ്റാണ്ടുകൾക്കപ്പുറത്തെ
സാറ്റലൈറ്റ് ഭൂപടങ്ങളിൽ കണ്ട്
കൗതുകം കൊള്ളും
കലോറി കാപ്സ്യൂളുകളിൽ വിശപ്പടക്കുന്നൊരു ടെസ്റ്റ്യൂബ് സന്തതി..

റോബോട്ടുകൾ പരക്കം പായുന്ന-
തീചൂടുള്ള തെരുവുകൾക്കടിയിൽ
ജലാശയങ്ങളുടെ പരേതാത്മാക്കൾ തേങ്ങുമ്പോൾ..,
പറവകളില്ലാത്ത ആകാശമാകെ
കടൽവെള്ളം കുടിക്കുന്ന നരപ്പക്ഷികൾ
യന്ത്രച്ചിറകുകളിൽ നിറയും..!!
------------------ShaLy--------------------