പുഴ വിളിക്കുന്നു ..!

പുഴ വിളിക്കുന്നു ..!

ഇലകളിടതൂർന്ന ആയുസ്സിന്റെ

പച്ചമരത്തിനിളം തടിയിലൊരു

നേർത്ത മുറിവ് ..!

മരം കൊത്തിയുടെ ഉരുക്കു കൊക്കു-

കൊണ്ടെന്നപോലൊരു മുറിപ്പാട്

അവിടെ കണ്ണീർ ചാലു പോലൊരു

നീർ നൂല് ....!

നിറം മങ്ങി മഞ്ഞയിലേക്ക് മടങ്ങുന്നു

പച്ചപുതച്ചാശ തീർന്നിട്ടില്ലാത്ത

ഇലക്കൂട്ടങ്ങൾ....!

പതിയെ പതിയെ വേരിൽ നിന്നൊരു വേദന

വലിഞ്ഞു വരളുന്ന ഞരമ്പുകളിലൂടെ-

ആകാശം മുട്ടിയ അഹങ്കാരത്തിലേക്ക്

പടർന്നു തുടങ്ങുന്നിടത്തു നിന്നും

വെള്ളം കൊടുത്ത പുഴയും

വളം പകർന്ന മണ്ണും 

വസന്തം കഴിഞ്ഞെന്നു നെടുവീർപ്പിടുന്നു..!

കഫൻപുടകളുമായി കൈനീട്ടുന്നു

ഖബറായി വാ പിളർത്തുന്നു...!!

വേരുകളും വിത്തുകളും 

പൊട്ടിയലറുന്ന നിമിഷങ്ങളെ

മൌനം  കൊടുത്തു പിന്നിലാക്കി

മരം മറവിയുടെ ഉപ്പുപാളികളിൽ

പൊങ്ങു തടിയായി

പുഴയുടെ ലക്ഷ്യത്തിലലിയുന്നു..!

അനന്തരം കുന്തിരിക്കപ്പുകയിൽ

ശ്വാസം മുട്ടി-

ഞാന്‍ നിദ്രയിലേക്ക് മലർന്നു വീഴവേ..!

വീണ്ടും....

ഒരു പുഴ വിളിക്കുന്നു...!!

ശൂന്യതയില്‍.. സര്‍വ്വം ..

'ശുഭം' 

---------------------------------Shaleer Ali---------------------------------