സുഹൃത്ത്‌...

സുഹൃത്ത്‌..


ഒരു ദിവസം വരും

നീ പോലുമറിയാതെ നിന്‍റെയുള്ളില്‍ 

ഉത്തരം മുട്ടിക്കുന്ന കുറെ ചോദ്യങ്ങള്‍ വരും

മറ്റാരുടെയോ വാക്കുകളിലൂടെ

എന്റെപേരില്‍ അക്കമിട്ടെണ്ണി വെച്ച

തെറ്റ് കുറ്റങ്ങളില്‍ നിന്ന്

നീ കാണാതെ പോയ ശരികളെ

ഹരിച്ചു ഞാനാം ശിഷ്ടത്തെ 

തിരഞ്ഞു നീയിറങ്ങുന്ന ദിവസം

അപ്പോഴെക്കുമൊരു പക്ഷെ

നീയാം വെയിലില്‍ ചുട്ടു പൊള്ളി

കറുത്ത് ശുഷ്കിച്ചൊരു നിഴല്‍ രൂപമായി

ഞാന്‍ മാറിക്കഴിഞ്ഞേക്കാം...

അല്ലെങ്കിലിവിടെ..
നീ പിരിഞ്ഞു നടന്ന ഈ പാതി വഴിയില്‍ ,

എന്റെ ചിരിപ്പൂവുകള്‍

നിലം തല്ലി വീണുപോയ

ഈ വിജന വീഥിയില്‍ ..

പ്രതീക്ഷകളുടെ നെയ്ത്തിരികള്‍

കെടാതെ കത്തിച്ചും

ഋതുക്കള്‍ക്കും ദിന രാത്രങ്ങള്‍ക്കും

കണക്കു വെക്കാതെ കാത്തിരുന്നും

നിലാവില്ലാത്ത ഇരുളിലേക്ക്

നിശബ്ദനായി നിരാശയോടെ 

ഇറങ്ങിപ്പോയിട്ടുണ്ടാവാം...

അന്നു നീ തളരരുത്

ഒന്നുമുരിയാതെയിതുപോലെ

തിരിച്ചു നടക്കരുത്

തലക്കും ഭാഗത്തെ

നിറം മങ്ങിയ മീസാന്‍ കല്ലില്‍

നിന്നെ കാണാന്‍ അന്നുമെന്റെ

കണ്ണുകളുണ്ടാകും

ഇന്നു നീ എന്റെ അധരങ്ങളില്‍

നിന്നടിച്ചു കെടുത്തിയ പുഞ്ചിരി

അവിടെയൊരു പാഴ്ചെടിയായി

കാറ്റിലുലഞ്ഞാടുന്നുണ്ടാവും

കുന്നു കൂട്ടിവെച്ച മണ്‍ കൂനയിലെന്റെ

മിഴി നീര്‍ ബാഷ്പങ്ങള്‍

അന്നും നിന്നെയോര്‍ത്തു

തങ്ങി നില്‍പ്പുണ്ടാവും ...

ഇന്നു നീ പുച്ഛിച്ചു തുപ്പിയ

എന്റെ വിശ്വാസ്യതയുടെ തിരിച്ചു കിട്ടിയ

ഒരു ശ്വാസമെങ്കിലും

നേര്‍ത്ത നിശ്വാസമായാ

വിമൂകതയിലെക്കൊഴുകി വീഴുമ്പോള്‍

അന്നു നീ അറിയും...

ഞാന്‍ നിന്റെ സുഹൃത്തായിരുന്നുവെന്ന്

നിന്റെ ഇന്ദ്രിയങ്ങളുടെ

അളവു കോലുകള്‍ക്ക്

അപ്രാപ്യനായി അതിരുകളില്ലാതെ

നിന്നെ സ്നേഹിച്ചു

പ്രാണനോട് ചേര്‍ത്തു വെച്ച

നിന്റെ സ്വന്തം സുഹൃത്ത്‌..!!
----------------------Shaleer Ali------------------------