"ഷണ്ഡന്റെ മകള്‍ " പറഞ്ഞത്

"ഷണ്ഡന്റെ മകള്‍ " പറഞ്ഞത്

മാടിനെ ചവുട്ടിച്ച്‌ ചെന പിടിപ്പിച്ച്
മടിശ്ശീല നിറയ്ക്കുന്ന മുത്തശ്ശി ,
കാടും മേടും എന്നോടൊത്തു
കയറിയിറങ്ങിയ, തണ്ടും തടിയുമുള്ള
അരുമ മാടിന്റെ കയറു പിടിച്ച്
അറവുകാരനു കൊടുക്കുമ്പോഴെന്റെ
കണ്ണിണ തുടച്ചമ്മ പറഞ്ഞത്
അതു 'ശിഖണ്ഡി'യാണെന്നായിരുന്നു.. !

അച്ഛനില്ലാത്ത പകലിലും
അച്ചനുറങ്ങിയ രാവിലും അമ്മയ്ക്കൊപ്പം
ചായ്പ്പില്‍ പതുങ്ങിയതാരെന്നു
ചോദിച്ചതിനന്നമ്മ പറഞ്ഞത്
അച്ഛന്‍ 'ഷണ്ഡനെ'ന്നും.!

പാടം നീളെ തുള്ളിച്ചാടി
കൊതിയടങ്ങും മുന്‍പേ
അറവു കത്തിക്കെറിഞ്ഞു കൊടുത്ത
കന്നിന്റെ കണ്ണ് തുറിച്ച കപാലം 
കശാപ്പു ശാലയ്ക്ക് മുന്നിലിരുന്നു
ഇന്നും ചോരയൊലിച്ച് 
ഈച്ചയാര്‍ത്ത് ഒരു വേളയെന്നെ
പുച്ഛിച്ചു ചിരിക്കുന്നുണ്ടെന്ന്
തോന്നി തുടങ്ങിയപ്പോഴാണ്
ശിഖണ്ടിയും ഷണ്ഡനും തമ്മിലെ
അര്‍ത്ഥബന്ധം തിരക്കാനിറങ്ങിയത്..

ഉറക്കം കെടുത്തിയ കടുത്ത വാക്കിന്റെ 
നേരര്‍ത്ഥവും നാനാര്‍ത്ഥവും
പറഞ്ഞു തന്ന വാസു മാഷിന്റെ
വട്ട മുഖത്ത് വിരിഞ്ഞു കണ്ട
കൌതുകത്തെ കണ്ണിറുക്കി ചിരിച്ചുടച്ചു
തിരിച്ചു നടക്കുമ്പോള്‍
കോലായില്‍ പമ്മിയിരുന്ന്
ഇമ ചിമ്മി ചിരിതൂകുന്ന
അമ്മയുടെ അടിവയറ്റില്‍
കാതിടതും വലതും മാറി മാറി ചേര്‍ത്ത്
"ഇത് ആങ്കുട്ടിയാണ്‌ട്ടോ"  
എന്നും പറഞ്ഞു കൊഞ്ചുന്ന
ആജാനുബാഹുവായ അച്ഛന്‍
ഒരു വലിയ ചോദ്യ ചിഹ്നം പോലെ
വളഞ്ഞു കഴിഞ്ഞിരുന്നു..!
---------------------Shaleer Ali---------------------